Pwy ydy Pwy?
- Arfon Jones (Swyddog Maes gig)
-
Cafodd Arfon ei benodi yn Swyddog Maes gig pan sefydlwyd yr elusen yn 1999. Cyn hynny, Arfon oedd Ysgrifennydd Cyffredinol y Cynghrair Efengylaidd yng Nghymru. Arfon sydd wedi ysgrifennu’r cyfieithiad llafar o’r Testament Newydd, beibl.net, ac ar hyn o bryd mae wrthi’n paratoi fersiwn tebyg o lyfrau’r Hen Destament. Mae’n efengylwr profiadol, yn weithiwr ieuenctid, ac yn bregethwr. Mae hefyd wedi cyfieithu llawer iawn o ganeuon addoliad cyfoes i’r Gymraeg. Mae Arfon yn briod i Rachel, ac mae ganddo ddwy ferch – Carys Mair a Seren Ann.
- Bethan Davies (Aelod o’r Pwyllgor)
-
Dwi’n dod o Llangefni yn wreiddiol, ond rwan dwi’n byw gyda fy ngwr yng Nghaerdydd. Ar y foment rwy’n dilyn cwrs i fod yn Seicolegydd Addysg. Ar ôl gadael y coleg fe es yn ôl i Ynys Mon i weithio gydag eglwysi a sefydliadau lleol yn gwneud gwaith ieuenctid a phlant. Yn ystod y cyfnod hwn dyfnhaodd fy maich dros bobl ifanc a phlant Cymru. Fy ngobaith i yw y bydd pob plentyn a pherson ifanc yn gallu clywed yr efengyl yn glir ac yn gywir. Credaf fod gig yn gwneud gwaith pwysig iawn yng Nghymru wrth wneud yr efengyl mor glir a hawdd i’w deall a phosib i blant a phobl ifanc.
- Ceri Darcy (Ysgrifennydd gig)
-
Rwy’n dod o Gaerdydd yn wreiddiol ond rwy’ bellach yn byw yn Rhydaman ac yn gweithio fel cyfieithydd i’r cyngor sir lleol. Rwy’n briod â Rhodri ac rydym yn rhan o Eglwys Efengylaidd Rhydaman. Ysgrifennydd gig ydw i ers 2004 ac felly fi sy’n gyfrifol am drefnu cyfarfodydd a rhoi gwybodaeth am gig i aelodau’r pwyllgor a phobl eraill. Rwy’n falch iawn fy mod yn gallu cefnogi gig mewn ffordd ymarferol ac mae’n wych bod yn rhan o elusen sy’n ceisio helpu’r Cymry i ddod i adnabod Duw drwy eu hiaith eu hunain.
- Dewi Arwel Hughes (Ymddiriedolwr)
-
Gogleddwr o’r Bala sy wedi byw ym Mhontypridd yn y De ers dros 30 mlynedd. Wedi bod yn athro coleg ac yn Gydlynydd cyntaf Tearfund yng Nghymru. Ar hyn o bryd yn Ymgynghorydd Diwinyddol Tearfund. Yn gweithio gyda gig oblegid ei hiraeth am weld y Gymru Gymraeg yn troi at Grist unwaith eto, ac oblegid ei fod yn ffrindie hefo Arfon Jones ac yn rhannu ei weledigaeth ers oesoedd!
- Mary Nicholas (Ymddiriedolwr)
-
Rwyf yn wraig i Philip, mam i bedwar (merch a thri mab), ac yn famgu i bump; yn ddarlithydd yng ngholeg Pen-y-Bont ar Ogwr; wedi bod yn Gristion ers yn 16 oed. Bûm yn athrawes Ysgol Sul am flynyddoedd ac yn ddiweddar bûm yn yr Affrig (Uganda) gyda’r eglwys – sef Danescourt Christian Fellowship lle mae Philip yn ddiacon ac yn drysorydd. Yn briod ers 39 o flynyddoedd ac yn dal i brofi daioni a thrugaredd Duw yn feunyddiol. ‘Rwy’n gweld gig yn bwysig iawn i Gymru a’r genhadaeth bresennol.
- Owain Jones (Aelod o’r Pwyllgor)
-
Nid Gog, na Hwntw wyf fi, ond Mid-Walian, am fy mod i wedi fy magu yn y Drenewydd. Dw i’n dal i fyw yno ac yn gweithio fel twrnai. Des i gredu yn yr Arglwydd Iesu Grist pan oeddwn yn ifanc, yn bennaf oherwydd gwelais ei bod hi’n well byw bywyd da nag un drwg, ac mai dim ond trwy Iesu marw ar y groes yr oeddwn yn gallu bod yn iawn gyda Duw. Dyma oedd y sbardun i mi fynd i rannu’r newyddion da ledled y byd, gan gynnwys carchardai yn Uganda, Kenya, a Bolivia am gyfnod byr. Ond po fwyaf oeddwn i’n crwydro’r byd efo’r newyddion da, cryfaf oedd yr awydd i ddod nol i’r canolbarth at fy mhobl fy hun. Mae’n drist meddwl fod y Cymry ar goll. Dw i’n bell o fod yn berffaith, ac wedi gwneud sawl camgymeriad yn y gorffennol – pethe dw i’n gwybod sydd wedi siomi fy nheulu a’m Tad nefol. Ond diolch byth, ma gyda ni Dduw sy’n maddau ac am i ni rodio hefo fe. Felly dw i’n diolch am gig, ac yn gweddïo a gobeithio y bydd y gwaith yn eich helpu chi i ddeall cyfiawnder Duw ar y groes.
- Owain Roberts (Is-Gadeirydd gig)
-
Rwy’n wreiddiol o Ben Llŷn ac ar hyn o bryd yn fyfyriwr PhD yn Sefydiad y Gwyddorau Mathemategol a Ffisegol ym Mhrifysgol Cymru Aberystwyth. Fe ymunais â gig yn mis Mai 2001. Roeddwn i’n awyddus iawn i fod yn rhan o fudiad sy’n hybu efengylu ymlith Cymry Cymraeg o bob oed. O ystyried y sefyllfa bresennol, rydw i’n credu ei bod hi’n hanfodol fod ganddon ni, Gristnogion Cymraeg, yr adnoddau a’r gefnogaeth i’n galluogi i dystiolaethu’n effeithiol i’n cyd-Gymry. Fel mae’r enw gig yn dweud, Iesu Grist ydy’r unig wir obaith i’n cenedl.
- Sara Redwood (Ymddiriedolwr)
-
F’enw i ydy Sara a dw i’n weithiwr ieuenctid mewn eglwys ym Mhenarth, yn ymyl Caerdydd. Cyn hynny ro’n i’n gweithio i’r Cynulliad Cenedlaethol yng Nghaerdydd. Dw i wedi ymuno â gig achos dwi’n credu bod Duw wedi rhoi’r gallu i mi siarad Cymraeg er mwyn ei wasanaethu, a dw i’n credu bod gig yn ffordd wych i gefnogi Cristnogion Cymraeg sy efallai yn teimlo mai nhw ydy’r unig Gristnogion Cymraeg yn y byd! Mae gig yn dangos drwy gyfrwng y Gymraeg pa mor wych a chyffrous ydy Duw!
- Siôn Meredith (Cadeirydd gig / Ymddiriedolwr)
-
Un o raddedigion Bangor, ond yn byw ger Aberystwyth ers 1987. Yn briod â Janet, a dau o blant, Hanna a Huw. Aelod o Eglwys y Santes Fair, Aberystwyth ac yn un o swyddogion gig o’r cychwyn oherwydd fy awydd i wneud rhywbeth ymarferol, yn nerth Duw, i ddod â gobaith i Gymry Cymraeg.
Rwyf bellach yn gweithio i Ganolfan Cymraeg i Oedolion Canolbarth Cymru ym Mhrifysgol Aberystwyth. Cyn hynny bûm yn gweithio i Tearfund ac i CYD.
- Simon Jeffs (Trysorydd gig)
-
Cefais fy magu yn Swydd Gaerwrangon, astudiais Ffiseg yn Llundain ac yn Aberystwyth ble cwrddais â’m gwraig a dechrau dysgu Cymraeg. Rydyn ni wedi addoli mewn eglwysi Bedyddwyr a Methodistaidd, ac yn 2002 roedden ni fel teulu yn teimlo arweiniad i adael eglwys efengylaidd Saesneg i ymuno ag Eglwys Bresbyteraidd Cymru. Rydyn ni’n disgwyl i Ysbryd Duw symud yn rymus yng Nghymru eto, ac yn gweld gig fel un o’r sanelau y gallai eu defnyddio os ydyn ni’n fodlon.
- Steffan Jones (Aelod o’r Pwyllgor)
-
Steffan Jones wyf i, o ganolbwynt y byd, sef Rhydaman, Sir Gaerfyrddin. Astudiais Hanes mewn lle bach o’r enw Caerdydd, cyn symud ‘mlaen i weithio gydag UCCF yno am flwyddyn. Rwyf bellach yn Swyddog Gwaith Cymraeg gyda Mudiad Efengylaidd Cymru, sy’n golygu teithio o gwmpas gwahanol ysgolion yn Ne Cymru, paratoi erthyglau a llyfrynnau, a chyd-weithio gyda gwahanol fudiadau ac unigolion sy’n gweithio’n y byd Cymraeg. Mae’n naturiol felly fod gig yn rhan bwysig o ngwaith, a rhannaf eu baich, a gweledigaeth Arfon, o gyrraedd y Cymry Cymraeg mewn iaith gyfoes, a gyda’r Beibl yn ganolog i’r cyfan.
- Watcyn James (Aelod o’r Pwyllgor)
-
Am yr ugain mlynedd diwethaf rwyf wedi bod yn weinidog yng nghylch Crosshands a Thycroes,Rhydaman. Ers mis Hydref 2003 dechreuais weithio gyda Chymdeithas y Beibl i hyrwyddo cenhadaeth eglwys Iesu Grist yng Nghymru. Rwy’n credu’n gryf bod gan Iesu Grist waith i’w gyflawni yng Nghymru eto ac yr wyf yn gwbl argyhoeddedig bod gan gig gyfraniad i’r dyfodol gobeithiol hwnnw.
